23/10/2022

دوێنێ شەمە، 23/10 لە هەندێك شاری گەورەی وڵاتانی دونیا خۆپیشاندان و ناڕەزایی گەورە بۆ هاوپشتی ڕاپەڕیوان لە ئێران کرا.

وێنەکان یەکێکیان وێنەی پرۆتێستی دانشگەی تەبریزە بەشی خوێندکارانی پزیشکی کە لە دەرەوەی زانکۆکەیان ناڕەزایی دەردەبڕن .

وێنەی دووهەم وێنەی خۆپیشاندانەکەی بەرلینە کە گەورەترین خۆپیشاندان بووە بە گوێرەی میدیا یەك ملیۆن و نیو بەشدارییان کردووە .

لە ڕاگەیاندنێکدا گرووپی ئێرانییەکان بۆ دادپەروەری و مافی مرۆڤ کە داوای دەرکردنی باڵوێزەکانی ئێرانیان کرد،  هاوکاتیش دەڵێن : ئێمە داواتان لێناکەین دەستوەردان لە ئێران بکەن، شەڕ بکەن یان سیاسەتی  گەمارۆدانی ئابووری  گەلی ئێران بکەن ، ئێمە دەمانەوێت گەمارۆی ئامانجدار بەسەر ڕێبەران، ئۆپەراتیڤەکان، ئۆلیگارکەکان و لۆبیستەکانی کۆماری ئیسلامیدا بسەپێنن.”

وێنەی سێیەم ناڕەزاییە لە تۆکوێ پایتەختی یابان .

وێنەی جوارەم کە دروشمی ژن ، ژیان ، ئازادیی هەڵگرتووە ئەوە ناڕازاییە لە ئەستەبنول لەبەردەم قونسلییەتی ئێرانیدا.

22/10/2022

لەگەڵ بەردەوامبوون و فراوانبوون و بەهێزبوونی خۆفپیشاندان و نارەزاییەکانی ئێران، دەسەڵاتیش لە ڕێگای چەقۆ وەشێنەکانییەوە هەڵمەتە دڕاندانەکانیان زیاتر دەکەن .  هەڵمەتەکان هەموو لایەناکانی گرتۆتەوە : قوتابیان و خوێندکاران و مامۆستیان و هونەرمەندان و نوسەران و کرێکاران و کاسبکاران و بێ کاران و منداڵان  هەموو توێژاڵە کۆمەڵایەتییەکانی دیکەی ئێران .

  بە گوێرەی ڕاپۆرتێکی ڕۆژنامەی گاردیان ژمارەی گیراوان دەستبەسەرکراوان خۆی داوە لە 12 هەزار و 500  و ئەو 200 کرێکارەی پاڵاوگەیەکی نەوت کە دوو هەفتە لەمەبەر مانیان گرتبوو هەموویان گیراون .

یەکێتی نوسەرانی ئێران ئاوا باسی لە بارودۆخەکە کردووە  “سەرکوتکردنی ئەو کەسانەی کە بە دەستی بەتاڵ ناڕەزایەتیان دەربڕیوە، لە ماوەی ٤٠ ساڵی ڕابردوودا ڕووداوێکی ڕۆژانە بووە.  بەڵام ئەوەی هەفتەی ڕابردوو بەسەر منداڵان و زیندانیاندا هات، یەکێکە لە ڕەشترین لاپەڕەکانی تۆماری حکومەتی ئێستا”

ئاماژەی بەوەشکردووە، “هێرشی هێزە ئەمنییەکان بۆ سەر قوتابخانە و زیندانەکان و لێدان و کوشتنی منداڵان و زیندانیان کارەساتێکە لەدەرەوەی کوشتنی خۆپیشاندەران لەسەر شەقامەکان بەڕیوەدەچێت.   لەم قۆناغەی سەرکوتکردندا حکومەت وەک هەمیشە نکوڵی لە واقیع دەکات و دەنگۆ بڵاودەکاتەوە و ڕای گشتی دەشێوێنێت بۆ ئەوەی هەوڵەکانی ڕێکخراو و گروپەکانی خەڵک بۆ دەربڕینی ڕاستییەکان پووچەڵ بکاتەوە”.

ناوەندی مافی مرۆڤ لە ئێران ڕایگەیاندووە کە تەنیا لە پارێزگای تاران سێ هەزار کەس دەستبەسەر کراون کە 835 کەسیان لە زیندان ماونەتەوە کە 200 کەسیان خوێندکاری زانکۆ بوون. دوای ئەوەی لە کۆتایی هەفتەدا ئاگر لە ناو ئەو دامەزراوەیە کەوتەوە، 1300 کەس لە زیندانی ئێڤینەوە ڕەوانەی بەندیخانەی ناوەندیی تارانی گەورە کراون.  ئاماری 12 هه‌زار و 450 ده‌ستبه‌سه‌ر له‌لایه‌ن ماڵپه‌ڕی هه‌واڵی مافی مرۆڤی ئێرانی حرانه‌وه‌ دراوه‌.

لە قوتابخانەکاندا هێزە ئەمنییەکان داوا لە مامۆستایان دەکەن کە کێشە سازەکان دەستنیشان بکە. ئەگەر رەتی بکەنەوە مەترسی دەستگیرکردنیان لەسەرە. بەپێی زانیارییەکان، مامۆستایەکی تاران دوای ئەوەی هەوڵی پاراستنی قوتابییەکانی داوە، بە دەستی هێزە ئەمنییەکان گیانی لەدەست داوە. هەروەها هەندێک لە زانکۆکان پێش دانیشتنی دیسپلینیی خوێندکاران لە پۆلەکان قەدەغە دەکەن لەسەر تێوەگلانیان لە خۆپیشاندانەکاندا.

ئەنجومەنی هەماهەنگی ڕێکخراوەکانی یەکێتی مامۆستایان “هاتنە ناوەوەی هێزی ئەمنی و سەربازی و یەکپۆشی” بۆ ناو قوتابخانەکان بە “پێشێلکردنی تایبەتمەندی قوتابخانە و فەزای پەروەردەیی” و “سەرکوتکردنی سیستماتیک” وەسف کردووە. نووسراوە: ناتوانین لە ناوەڕاستی باروت و ئاگر و فیشەکدا تەرکیز لەسەر تەختە ڕەشەکە بکەین.  لەم ڕۆژگارە مێژووییانەی خەڵکدا ژمارەیەک خوێندکاری بێتاوانی ئەم وڵاتەتان بە دڵ پڕ لە ڕق و دەست پەڵەی خوێنەوە کوشتن و شانازیتان پێوە کرد.  پێکەنینی  سەرخۆشیتان  هەمووان دەیبیستن ”

لە لایەکی دیکەشەوە ئێڵناز ڕکابی دەستبەسەرە و بڕیارە گەر ئەوەی حکومەت دەخوازێت لێی نەیکات ئەوە ماڵەکەی باوکی کە بایی 276 هەزار پاوەندە دەکرێتە موڵی حکومەت .

جیهان نۆرمان

22/10/2022

لەم کۆمەڵەدا هیچ کاڵایەك بە مەبەستی سوودبەخشین بەرهەم نایەت. بەڵکو تەنها بە مەبەستی فرۆشتنی، بە مەبستی گۆڕینەوەی بۆ پارە. لە ڕاستیدا، ئەوەی

پێی دەوترێت سوودبەخش، زیانبەخشییە، وە هەموو بەرهەمێکی وەك خواردن، خواردنەوە، پۆشین، کە پێداویستی سەرەکی ژیانن، هەڵگری کۆمەڵێك پێکهاتەی مەترسیدارن لەسەر ژیان. لە هەمووی گرنگتر، خاوەن کۆمپانیا بەرهەمهێنەرەکان، لێپرسراوانی تەندروستی و پارێزگاری هاووڵاتیان، لە هەموو جیهاندا، زۆرباش ئاگاداری ئەم ڕاستیەن. دامەزراوە نێو دەوڵەتیەکان خۆیان، بە ڕاپۆرتی ساڵانە، بە ووردی و زانستیانە کارەساتی کوشندەی ئەم ڕووداوە بەردەوامە بڵاو دەکەنەوە. زاڵبوونی بەهای مردوو، بەهای پارە، بەهای ئاڵوگۆڕو کەپیتال، وەك دکتاتۆرێکی بێهاوتاو، بێ بەرامبەر، باڵی مردنی بەسەر مرۆڤ و ژینگەیدا سەپاندووە. بە جۆرێك ئەو خۆسەپاندنە تەواوە کە مرۆڤەکان، کۆیلەکانی ژێرباڵی ئەم دەوڵەتە، لە کردارو هەڵسوکەوتیاندا، پەیڕەوی بێهۆشانەی بڕیارو خواستی دکتاتۆرێکی کۆمەڵایەتی بن، وەك ئەوەی بە خواست و ئازادی خۆیان نەخشەی ژیانیان کێشابێت. دکتاتۆریەتی دیمۆکراتیانەی کەپیتال، بەوەی کە هەموو مرۆڤی کردۆتە کاڵایەك، کۆیلەیەکی بەرهەمهێنەرو خزمەتکەری یەزدانی بەها«پارە، وەك کەپیتال»، دەرگای تەواوی کردۆتەوە لە بەردەم هەموو ئازادیەکدا کە مەترسی نەبێت بۆ تەندروستی کۆمەڵەکەی. وەك مارکس دەبێژێ: هەموو شتێکتان بۆ ئەکەم، بەس داوای ئەوەم لێ مەکەن کە لە سوار پشتان دابەزم!

بە کورتیەکەی ئێستا زیاتر لە جاران، نەك هەر داوای ئەوەمان لێدەکات بەرگەی سوابوونەکەشی بگرین، بەڵکو واشمان لێبکات کە زەوقی لێ بچێژین و بە سودبەخشی بزانین.

بۆ ئەوەی سوپایەکی کرێکار بەرهەم بهێنێت، سوپای فرۆشتنی هێزی بازوو، سەرمایە(کەپیتالیزم)، لە سەرەتای سەرهەڵدانیدا، لە هەموو جیهاندا، زۆر لانەی وێرانکرد، زۆر کۆمەڵی بێتاوان و سروشتنیشینی تێکداو لە ناوبرد، زۆر مرۆڤی فەلاقە و زیندان و تێرۆرکرد، زۆر بوونی دژە شارستانیەتی کارو دژە دەوڵەتی تەفروتوناو جێنۆساید کرد. بەرهەمهێنانی کاریکرێگرتە، کە ئێستا ئاوو هەوای ژیانی ئەم کۆمەڵەیە، گەورەترین تاوانی مێژووە، کە ئێستا باس دەکرێت بە پێشکەوتن و زانست، وە بە جۆری یەزدان دەپەرسترێت. لە ڕێبازی پێشکەوتنی ئەم شارستانیەتی بە کۆیلەکردندا، هەموو ئامرازەکانی پەرستن خراوەتەکار بۆ بەرهەمهێنانی ئیمانداران بە ئیرادەی یەزدانی پارە، ئاینی کەپیتال. هیچ کۆمەڵێکی ڕابووردو، وەك ئەم کۆمەڵە ئیمانداری بەرهەم نەهێناوە. ئەم کۆمەڵە کۆمەڵێکی ڕیالیستی ئایندارە.

شۆڕشی ئێستا شۆڕشی هۆشیاریە، بە مانا مێژوویەکەی، شۆڕشێکی تەواوە دژی ڕیشەی کۆیلەیەتی، دژی دەوڵەت وەك کۆمەڵێکی نامۆ و نامۆکەری مرۆڤ ژیانی لە خۆی و ژینگەی. هەر ڕێبازێك لە مرۆڤ و پێداویستی ژیان و کۆمەکی مرۆڤەوە سەرهەڵنەدات، خەبات نەکات، هەر دەبێتە کاڵایەکی تری بەهێزکردنی بازاڕی پارە، واتە کۆیلەیەتی. هەر بوونێك هەوڵبدات شێوازی دەوڵەت بگۆڕێت، نەك لە ڕیشەدا لە ناوی ببات،نەك لە بناغەوە لە گرفتەکان بکۆڵێتەوە، کەمرۆڤ خۆیەتی لە پەیوەندییەکانی ژیاندا، مسۆگەر لە کۆتایدا دەگەڕێتەوە ماڵی دەوڵەت.

21/10/2022

چالاکییەکانی گروپی ‘ نەوت بوەستێنە” لەم مانگەدا هەموو ڕؤژێك چالاکیییەکیان ئەنجامداوە دوێنی ، 5شەمە ، 20/10 بیستەمین چالاکییان ئەنجامدا کە ڕەنگکردنی دیوارەکانی یەکێک لە شۆپە بەناوبانگەکانی لەندەن بەناوی هاروتەوە بوو ، کە پێشتر هی موحەمەد عەلی فەیاد باوکی ئەو کوڕەی کە لەگەڵ دایەنەی کۆنە ژنی مەلیك چارلس ، بە ڕووداوی سەیارە مرد .

گروپێکی 30 کەسی سەعات 9 ی سەر لەبەیانی چوونەتە بەردەم شۆپەکە و دوانیان ئەوەیان کردوە ئەوانی دیکەشیان شەقامەکەی بەردەمی شؤپەکەیان بۆ ماوەیەك داخست و ڕێگایان لە سەیارە گرت.  یەکێك لە چالاکوانەکان بە میدیای وت:  

” حکومەتەکەمان لەڕووی تاوانەوە بێتوانا و لەڕووی ئەخلاقییەوە ئیفلاس بووە. ئەوان چالاکانە هەوڵی خێراکردنی بەرهەمهێنانی سووتەمەنی بەردینی دەدەن، کە دەبێتە هۆی مردنی ملیۆنان کەس، لە هەمان کاتدا شکست دەهێنن لە چارەسەرکردنی خراپترین قەیرانی تێچووی ژیان کە ئەم وڵاتە تا ئێستا بینیبێتی.  خەڵکانی بارخوار و بێ دەرەتان لەم زستانەدا لە ماڵەکانیاندا ڕەەقدەبنەوە تا مردن لە کاتێکدا حکومەت رەتیدەکاتەوە باج لەسەر دەوڵەمەندەکان و کۆمپانیا گەورەکانی وزە بسەپێنێت کە قازانج لە نەهامەتییەکانمان دەکەن.”

لەو چالاکییەدا ئەو دوو کەسەی کە بۆیەی دیوارەکانی شۆپەکەیان کرد گیران لەگەڵ 18 کەسی تریان کە شەقامەکەیان داگیرکردبوو.

نە شا و نە ڕابەری، بڕوخێت سیستەمی سەروەری

ڕاپەڕینی چەوساوان لە ئێران یەک ڕاپەڕینە، دابەشکردنی بەسەر ئێتنییەکان هەنگاوێکی دژە–شۆڕشانەیە!

بۆ ئەوەی ڕاپەڕینی چەوساوان لە ئێران وەک ڕاپەڕینی چەوساوان لە سوریە (٢٠١٢) نەگۆڕدرێت بە جەنگی میلیشیایی ئایینەکان و ئێتنییەکان، پێویستە لە مێژووی خەبات و بەرەنگاری ئەزموون وەربگرین.

ئێستا کە دە ساڵ بەسەر جەخماخەی ڕاپەڕینی چەوساوانی سووریە تێپەڕیوە، مێژوو بۆ ئێمە سەلماندوە، گوۆڕینی ڕاپەڕینی جەماوەریی و کۆمەڵایەتیی بە جەنگی میلیشیایی و بۆڕبۆڕێنی ڕامیاریی ڕەوتە ڕامیارییەکان، زەمینەی بەهێزبوونەوەی دژە–شۆڕش لەباردەکات و ڕاپەڕین دەگۆڕێت بە گەمەی ڕامیاریی دەزگە سیخوڕییەکانی زلهێزان و کۆمپنانییە جیهانخۆرەکان و بەرپاکردنی حەمامی خوێن لە ڕێگەی جەنگی میلیشیاکان وەک دەسکەلای دەوڵەتانی ناوچەکە.

بەداخەوە لە ڕاپەڕینی چەوساوانی تونس تاکو سوریە و یەمەن دژە–شۆڕش توانی بە بەرزکردنەوە و پیرۆزکردنی ئاڵای دەوڵەت و چەکدارکردنی ڕاپەڕیوان ڕاپەڕینەکان بگۆڕێت بە ئامرازی جێبەجێکردنی نەخشەی زلهێزەکان و کۆمپانییەکان، جەنگی دە ساڵەی نێوخۆیی سوریە و یەمەن زیندووترین نموونەن، کە بوون بە گەورەترین بازاری چەکفرۆشی.

هەرچەندە ئێران لە کۆمەڵێک هەرێمی ئێتنیی و ئایین جیاواز پێکهاتوە و خۆنیشاندان و ناڕەزایەتییەکانی پێشوو بە جۆرێک بەسەر ئەو بوونە ڕامیاریی و کولتوورییانە بەش بووبوون، بەڵام ئەم جارە بەپێچەوانەی پێشوو، وەک ڕاپەڕینی ١٩٧٩ چەوساوانی ئێران وەک یەک جەستە ڕاپەڕینەوە. ئەوە ئەرێنییترین و دڵخۆشکەرترین وەرچەخان و هەڵکشانی تێکۆشانی چەوساوانی ئێرانە، ئەزموون وەرگرتنە لە مێژووی چوار دەهەی ڕابوردوو، نیشانەی خۆهوشیاریی چەوساوانی ئێرانە.

بەڵام وێرای هەموو دڵخۆشییەک بەو ئاستە لە خۆهوشیاریی چەوساوان، هێشتا نابێت یەک چرکە لە مەترسیی پلانەکانی دژە–شۆڕش (حکومەت تاکو شاخوازان و ناسیونالیستەکان و سەلەفییە سوننەکان) خافڵ ببین. ئەگەر بە وردیی کاردانەوە و هەڵوێستەکان لە نێوخۆ و دەرەوەی ئێران سەنج بدەین، بەداخەوە، لێرە و لەوێ هەوەڵەکانی دژە–شۆڕش دەبیندرێن، هەرچەندە سەرەتایین، بەڵام هەموو شتێک بە سەرەتایەک بەڕێدەکەوێت، گۆڕینی ڕاپەڕینی چەوساوانی سوریە بە جەنگی میلیشیایی دە ساڵە و وێرانکردنی شارەکان و گوندەکان و گۆڕینی ڕاپەڕینەکە بە حەمامی خوێن بۆ چەوساوان، لە یەک تەقە و لە هەوڵێکی سەرەتاییەوە دەستیپێکرد، کە تەقەکردنێک بوو لەنێو خۆنیشاندانێکی هێمنانەی پاش نوێژی هەیینییەک.

لە ماوەی چەند هەفتەی ڕابوردوو لە دەرەوەی ئێران شاخوازان بەردەوام بە ئاڵای دەوڵەتەوە بۆ گۆڕینی ناڕەزایەتییەکان هەوڵدەدەن و حکومەتیش لەنێوخۆ بە پەلاماردانی بنکەکانی ئۆپۆزسیۆنی چەکدار لە دەرەوەی ئێران (لە هەرێمی کوردستان/عیراق) و هەر ئاوا پەیڕەوکردنی دوو ئاست لە سەرکوتکردن لە بلووجستان و کوردستان توندتر بەراورد بە شارەکانی دیکە، هەوڵیدا هەم میلیشیای حزبە چەکدارە کوردەکان بۆ وەڵامدانەوەی چەکدارانە ڕاکێشبکات و هەم لەنێوان ڕاپەڕیوانی هەرێمـەکانی بلووجستان و کوردستان و ئازەرباینجان و خوزستان لەتەک نێوەندی فارسی–زمان–نشین گومان و دووبەرەکیی درووستبکات. هەڵبەتە هاوکاتی هەوڵەکانی حکومەت، حکومەتانی پاکستان و تورکیە و حکومەتەکانی کەنداوی عەرەبیی لە ماوەی چەند دەهەی ڕابوردوو دەستەکانی خۆیان لەنێو ئەو هەرێمانە کە هەڵاواردنی “ئایینی و نەتەوەیی” هەیە، ئامادەکردوون و هەرئێستا خەریکی دنەدانی دووبەرەکیی هەن. لە گشت ئەوانەش کاراتر و خراپتر دوو دیاردەن، کە لە ماوەی ئەم چەند ڕۆژە دەرکەوتوون: یەکەم تەقەکردن و چەکدارکردنی ڕاپەڕین بەتایبەت لە هەرێمەکانی دەرەوەی ناوەند. دوەم ئێتنیی–کردنی خۆنیشاندانەکانی هاوپشتیی لە دەرەوەی ئێران بەتایبەت لە ئۆروپا، کە خۆنیشاندانی هاوپشتیی بەس بۆ ڕاپەڕینی هەرێمێک دەکەن و ئەوەش سەرەتای پارچەپارچەکردنی ڕاپەڕین و درووستکردنی دووبەرەکییە بە هاندانی نەتەوەچییەتی و سەلەفیەتی ئایینیی.

ئێمە وێرای دژایەتی و ڕسواکردنی ئەو هەوڵانە و هەوڵدان بۆ بەرگرتن لە هەر هەوڵ و بۆچوون و بانگەوازێکی دژە–شۆڕشانە، بە گوێرەی ئەزموونگیریی خۆمان لە مێژووی ڕاپەڕینەکان و بە دیاریکراویی ڕاپەڕینی ١٩٧٩ چەوساوان لە ئێران و ڕاپەڕینی ١٩٩١ چەوساوان لە عیراق و خۆنیشاندان و ڕاپەڕینەکانی دواتر، ئەو سەرنجانەی خۆمان وەک پێشنیار و پشتیوانی بە هاوڕێیان و هاوچینانی خۆمان لە هەموو هەرێمەکانی ئێران پێشکەش دەکەین، تاقە ئامانجی ئێمە بەرگرتنە لە هەوڵی ئەو دەستە و لایەنانەی کە خەریکن ڕاپەڕینی یەکگرتوانەی ئەم جارەی چەوساوانی ئێران بە پارچە پارچەی ناسیونالیستیی و بە جەنگی میلیشیایی دەگۆڕن.

پێویستە ئەوەش بڵێین، کە خۆشبەختانە تاکو ئەوێندەرێ ئێمە ئاگاداری چالاکییەکانی نێوخۆی شار و هەرێمەکانی ئێران هەین، بەگشتیی ئاستی خۆهوشیاریی ڕاپەڕیوان لە ئاستی بەرپرسیاریی مێژوویی شۆڕشگەرانە هەیە و مەترسییەکان تاکو ئێستا کەم هەژموون بوون. بەڵام لەتەک ئەوەش نابێت ئێمە ( وەک پشتیوانیکەرانی هاوچینانی ڕاپەڕیو لە ئێران) کەمتەرخەمانە دابنیشین و جموجووڵ و هەوڵی ڕەوت و میلیشیا دەسەڵاتخوازەکان (لە ناسیونالیست و سەلەفی و شاخواز تاکو چەپی حزبگەرا) نادیدە بگرین، چونکە ئەوانە هەردەم دەستەی ئامادەکراو و شانەی خۆمەڵاسدەری زلهێزەکان و کۆمپانییەکان بوون بۆ کۆنتڕۆلکردن و بەلاڕێدابردنی هەر خۆنیشاندان و ڕاپەڕینێک؛ دژە–شۆڕش هەموو کاتێک لە هەموو شوێنێک لە ڕێگەی ڕەوت و حزب و ملیلیشا دەسەڵاتخوازەکان توانیویەتی و دەتوانێت بە قۆستنەوەی خۆشباوەڕیی چەوساوانی ناهوشیار بەسەر شەپۆل و هەڵکشانەکانی (شۆڕشی کۆمەڵایەتیی) زاڵ ببێت و تێکیبشکێنێت.

لە بەرانبەر ئەو هەوڵانەی دژە–شۆڕش، پشتیوانی ئازادیخوازان و ڕەوت و بزووتنەوە دژە–سەروەرکان لە ئاستی جیهانیی و لە هەموو هەرێمەکانی جیهان بۆ چەوساوانی ڕاپەڕیو لە ئێران، دەتوانێت بەهێزکەری هاوسەنگیی هێز بۆ بەرەی شۆڕش و هەر ئاوا کاراترین وەڵامدانەوە و بەرەنگاریکردنی شۆڕشگەرانە بێت دژی هەوڵەکانی دەوڵەت و سەرمایەداران، کە هەر ئێستا خەریکی ئامادەکردنی سیناریۆی خۆیانن بۆ کۆنتڕۆڵکردنی کۆمەڵی ئێرانی پاش ڕووخانی حکومەتی ئێستا.

نا بۆ دەوڵەت و حکومەت، نا بۆ چەک و میلیشیا، نا بۆ حزبایەتی، نا بۆ ناسیونالیزم، نا بۆ سەلەفیزم

بەڵێ بۆ هاوپشتی جیهانیی، بەڵێ بۆ ڕاپەڕینی کۆمەڵایەتیی، بەڵێ بۆ خۆبەڕێوەبەریی کۆمەڵایەتیی خۆجێی هەموو هەرێمەکانی ئێران، بەڵێ بۆ فێدرالیزمی نادەوڵتیی

سەکۆی ئەنارکیستانی کوردیی–زمان

١٤ی ئۆکتۆبەری ٢٠٢٢

https://linktr.ee/anarkistan

لە پەیجی هاوڕێ کامەران ئەحمەدەوە وەرگیراوە

19/10/2022

کرێکارانی نەوتی ئێران لە بەرامبەر سەرکوتکردن و کوشتنی خەڵکدا:” بێدەنگ و پاسیڤ نابین، پێکەوە و بە یەک دەنگ لەگەڵ خەڵکدا ناڕەزایەتی دەردەبڕین”

لە ١٠ی ئۆکتۆبەر کرێکارانی پترۆکیمایی لە عسلویە- پارێزگای بوشەهر – پەیوەستبوونی خۆیان بە توڕەیی و ناڕەزایەتییەکانی خەڵک لە بەرامبەر کوشتنی ژینا ئەمینی (مەهسا) تەمەن ٢٢ ساڵ، و نەبوونی ئازادی، پێشێلکردنی مافەکانی ژنان، و دژە بە فەزای سەرکوت و دەستگیراکردنی خەڵک، و قەیرانی ئابووری درێژخایەن لەو وڵاتە ڕاگەیاند. و لە نامەیەکی کراوەدا لە تۆرە کۆمەلایەتییەکان هاوپشتی خۆیان بۆ ناڕەزایەتییەکان دەربڕی و خوازیاری دەستبەجێ و بێقەیدوشەرتی دەستگیراوەکان و سەرجەم زیندانیانی سیاسییان کرد. لە عەبادان و بەندەر عباسیش هەمان دەنگی ناڕەزایەتی دژ بە ڕژێمی مەلاکان بەرز بووەتەوە.

18/10/2022

پیشەسازییەکان لە سەرانسەری فەرەنسا ئەمڕۆ سێشەممە مانیان گرت بۆ پاڵنانی بەرزکردنەوەی مووچە تاکو لەگەڵ بەرزبوونەوەی کولفەی ژیاندا هاوتا بێتەوە، ئەمەش پێکدادانی نێوان کرێکاران و حکومەت زیاتر دەکات دوای چەند هەفتەیەک لە وازهێنان کە پاڵاوگەکانی نەوتی تووشی شۆک کرد و بووە هۆی کەمیی بەنزین لە سەرانسەری وڵاتدا.   کرێکارانی هێڵی ئاسن و تری گواستنەوە، کۆمپانیاکانی بارهەڵگر و پاس، بەشێک لە مامۆستایانی ئامادەیی و کارمەندانی نەخۆشخانە حکومییەکان گوێیان بە بانگەوازێکی سەندیکایەکی کرێکارانی نەوت داوە کە پیشەسازی فەرەنسا پاڵ بە زیادکردنی مووچەوە بنێت و ناڕەزایەتی دەربڕین بە دەستێوەردانی حکومەت لە مانگرتنەکانی پاڵاوگەکاندا.   هەروەها ڕۆژی یەکشەمە  هەزاران کەس ڕژانە سەر شەقامەکان بۆ ڕێپێوان دژی بەرزبوونەوەی نرخەکان.

مەحروك لەسەرەی ڕیزدا بۆ سووتەمەنی لە بەنزینخانەیەکی پاریس وتی: “دوو هەفتەیە”. “ئێستا دەستی کردووە بە زۆر درێژبوونەوە … پێویستە چارەسەرێک بدۆزرێتەوە.” لەلایەکی دیکەوە، لە هەر دوو شەمەندەفەرێکدا تەنها یەک شەمەندەفەر ڕۆژی سێشەممە لە تۆڕی شەمەندەفەری هەرێمی باشووردا دەڕۆیشتن، ئەمەش بووە هۆی دواکەوتن لە کاتی پڕبوونی بەیانیاندا. هەواڵەکان باس لە پچڕانی شەمەندەفەرە خێراکان لە باکوور بڵاوکرایەوە، هەروەها لەسەر شەمەندەفەری یۆرۆستار و شەمەندەفەرەکانی نێوان شارەکان کە فەرەنسا بە ئیسپانیا دەبەستنەوە.

ناڕەزایەتییەکانی ڕۆژی سێشەممە لە فەرەنسا دوای ئەوە دێت کە سەندیکای چەپی سی جی تی ڕێکەوتنێکی ڕەتکردەوە سەبارەت بە زیادکردنی مووچە کە کۆمپانیای زەبەلاحی نەوتی تۆتالئینێرجیس لەگەڵ دوو سەندیکای دیکە ڕۆژی هەینی ئەنجامیدا. سەندیکاکانی CFDT و CFE-CGC کە پێکەوە نوێنەرایەتی زۆرینەی کرێکارانی فەرەنسی گروپەکە دەکەن، رێککەوتن لەسەر زیادکردنی مووچەی 7% و پاداشتی دارایی کراوە.  مانگرتووان داوای کرێی زیاتریان کرد لە قازانجی بای کۆمپانیاکانی وزە کە نرخی نەوت و گازیان بەرز بووەتەوە لە کاتێکدا شەڕی ڕووسیا لە ئۆکرانیا قەیرانی وزەی  توندتر کردووە و  دەکات.

18/10/2022

ڕۆژی 13 ی مانگ  داویانە بەسەر قوتابخانەیەکدا لەبەر ئەوەی قوتابییان ئامادە نەبوون سرودی مەدح و سەنا بە ئایەتوڵا خامەنەییدا بڵێن. لەبەرئەو زۆریان داوە لە قوتابییەکان و تا ڕادەی ئەوەی کە هەندێك لەو قاتابییانە بە پەلە گەیەنراونەتە خەستەخانە بەڵام بە داخەوە قوتابییەکی 16 ساڵ بە ناوی ئەسرا پەناهی لەو لێدان و ئەشکەنجەیەدا گیانی لە دەستداوە.

لەم ویکەندەی کە تێپەڕی لە  دانشگەی ئەسفەن قوتابییەکان نەخشەی ئێرانیان بە رەنگی سوور کە هێمایە بۆ خوێن کێشاوە  شوێنی دەستیان لەسەری داناوە و  هەڵیانواسیوە و خۆشیان چالاکی ” دانیشە و مەجوڵێ لە شوێنی خۆت-یان” بەکارهێناوە

یەکێتی مامۆستایان ڕاگەیاندنیێكیان لەسەر وەحشیەتگەری بەڵتەچییەکان دەرکردووە داوای دەست لەکارکێشانەوەی یوسف نوری وەزیری پەرەوەردە و ڕؤشبیری دەکەن.

خۆپیشاندان و ناڕەزاییەکان تا بێت فراوانترو خۆگرتر دەبێت چین و و توێژالە کۆمەڵایەتییەکانی هەموو ئێرانی گرتۆتەوە قوتابییە منداڵەکانیش بوونەتە بەشێكی ئەم ناڕەزاییە.

قوتابییەکی گەنج دەلێت  ” “لە ئەردەبیل یەک خزمم نییە، بەڵام بەم سەرکوتکردنە دڕندانەیە بۆ سەر خوشکەکانمان کە تەمەنیان تەنها 16 ساڵ بوو، هەموو میللەتیان بەئاگا هێنایەوە“.  ئاماژەی بەوەشکردووە، “هەرگیز نەماندەزانی ئەوەندە یەکگرتووین – لە سەرانسەری ناوچەکانی بەلوچ و هەروەها ناوچە کوردییەکان.  ئێستا  جیهان باسی نیکا و سارینا و ئەسرای بیستووە، بەڵام ئەوەندە منداڵی دیکەی بێ ناو هەن کە ئێمە هیچیان لەبارەیەوە نازانین”.

هاوکاتیش ژیانی شاخەوان ئیلناز ڕیکابی لە مەترسسیدایە . دوای بەشداریکردنی لە بۆنەی پاڵەوانی نێودەوڵەتی لە شاری سۆل- کۆریای جنوبی بە بێ لەچك .  هەر بە گەیشتنەوەی فڕۆکەخانەی ئیمام خومەینی لە تاران یەکسەر دەستبەسەر کراوە و تەلەفون و پەساپۆرتەکەی لێسەنراوە و بێ هەواڵ ماوەتەوە.

ڕۆژی 13 ی مانگ  داویانە بەسەر قوتابخانەیەکدا لەبەر ئەوەی قوتابییان ئامادە نەبوون سرودی مەدح و سەنا بە ئایەتوڵا خامەنەییدا بڵێن. لەبەرئەو زۆریان داوە لە قوتابییەکان و تا ڕادەی ئەوەی کە هەندێك لەو قاتابییانە بە پەلە گەیەنراونەتە خەستەخانە بەڵام بە داخەوە قوتابییەکی 16 ساڵ بە ناوی ئەسرا پەناهی لەو لێدان و ئەشکەنجەیەدا گیانی لە دەستداوە.

لەم ویکەندەی کە تێپەڕی لە  دانشگەی ئەسفەن قوتابییەکان نەخشەی ئێرانیان بە رەنگی سوور کە هێمایە بۆ خوێن کێشاوە  شوێنی دەستیان لەسەری داناوە و  هەڵیانواسیوە و خۆشیان چالاکی ” دانیشە و مەجوڵێ لە شوێنی خۆت-یان” بەکارهێناوە

یەکێتی مامۆستایان ڕاگەیاندنیێكیان لەسەر وەحشیەتگەری بەڵتەچییەکان دەرکردووە داوای دەست لەکارکێشانەوەی یوسف نوری وەزیری پەرەوەردە و ڕؤشبیری دەکەن.

خۆپیشاندان و ناڕەزاییەکان تا بێت فراوانترو خۆگرتر دەبێت چین و و توێژالە کۆمەڵایەتییەکانی هەموو ئێرانی گرتۆتەوە قوتابییە منداڵەکانیش بوونەتە بەشێكی ئەم ناڕەزاییە.

قوتابییەکی گەنج دەلێت  ” “لە ئەردەبیل یەک خزمم نییە، بەڵام بەم سەرکوتکردنە دڕندانەیە بۆ سەر خوشکەکانمان کە تەمەنیان تەنها 16 ساڵ بوو، هەموو میللەتیان بەئاگا هێنایەوە”.  ئاماژەی بەوەشکردووە، “هەرگیز نەماندەزانی ئەوەندە یەکگرتووین – لە سەرانسەری ناوچەکانی بەلوچ و هەروەها ناوچە کوردییەکان.  ئێستا  جیهان باسی نیکا و سارینا و ئەسرای بیستووە، بەڵام ئەوەندە منداڵی دیکەی بێ ناو هەن کە ئێمە هیچیان لەبارەیەوە نازانین”.

هاوکاتیش ژیانی شاخەوان ئیلناز ڕیکابی لە مەترسسیدایە . دوای بەشداریکردنی لە بۆنەی پاڵەوانی نێودەوڵەتی لە شاری سۆل- کۆریای جنوبی بە بێ لەچك .  هەر بە گەیشتنەوەی فڕۆکەخانەی ئیمام خومەینی لە تاران یەکسەر دەستبەسەر کراوە و تەلەفون و پەساپۆرتەکەی لێسەنراوە و بێ هەواڵ ماوەتەوە.

زاهیر باهیر

17/10/2022

ئەوەی کە ئەمڕۆ بە ناوی ئابوری  لیبراڵ لە زۆرێك لە وڵاتاندا پیادەدەکرێت، ئابووریی نییە بەڵکو جەنگێکی سەرانسەرییە کە بەرانبەر بە دانیشتوانەکەی بەڕێدەکرێت. جەنگی ڕووتانەوە و چەوساندنەوە و برسسیکردنی زۆرینە و هەڵکەندنی زۆرێك لە زێدی خۆیان و باوباپیرانیان و دروستکردنی جەنگێکی ڕاستەوخۆی کوشتن و بڕین و وێرانکارییە.

ئابوورییەك کە لەسەر خۆێن و جەنگ و کوشتن و بڕین بژی و بەردەوام بێت ئەمە چ ئابوورییەکە؟ ئابوورییەك کە بۆ کەمایەتییەکی ئێکجار کەم خێرێکی زۆر بداتەوە نەك بۆ هەموان ، چ ئابوورییەکە؟ ئابوورییەك چەند فۆرمیلەیەکی وەکو بەرزکردنەوەی بەهای پارە و دابەزینی، زیادکردنی ڕێژەی سوو و کەمکردنەوەی، هەڵئاوسانی پارە و دابەزاندنی بیسوڕێنێ و بەڕێی بکات، چ ئابوورییەکە؟ ئابوورییەك کە بە پژمەی کەسێكی زۆر دەوڵەمەندی وەکو ڕۆبێرت مەردۆك ، جۆرج سۆرۆ، ئێلون میسك ، جێف بیزۆس و بیڵ گەیت و هەندێکی تریان بدات لە تایەك لە دارایی وڵاتان، چ ئابوورییەکە؟، ئابوورییەك کە تەنها 4 وشەی بەسە لەلایەن ئەو زاتانەی سەرەو بۆ داڕمانی: ” ئەم سیستەمە هەرەس دەهێنێت” ، دەبێت چ ئابووریەك بێت؟

بریتانیاش یەکێکە لەو وڵاتانە  خاوەنی ئەو چەشنە ئابوورییە و لەم جەنگەدایە. دوای قەیرانە داراییەکەی ساڵی 2008 تا ئێستا بارودۆخی ژیانی دانیشتوانی بریتانیا لە خراپیدایە و  ڕۆژ بە ڕۆژیش بەرەو خراپتر دەڕوات کە لە ئێستادا گەیشتۆتە لوتکە.  هەر بەهۆی ئەو بارودۆخەوە لە شەش ساڵدا چوار سەرەك وەزیری سەر بە هەمان حیزب هاتوون و ڕۆیشتوون .

لەگەڵ ئەوەشدا باری ژیانی خەڵکی بریتانی بەرەو خراپ و خراپتر ڕۆیشتووە.  کولفەی ژیان بە ڕێژەی لە سەدا 10 کە ئابووریناسەکان و حکومەت پێیدەڵێن هەڵئاوسانی پارە سەرکەوتووە ، لیستی بینینی دکتۆری پسپۆڕ و داخڵبوون بە خەستەخانەکان لە 6 ملیۆن کەسەوە لە مانگی نیسانەوە بۆ 7 ملیۆن کەس سەرکەوتووە، کولفەی منداڵ لە حەزانەدا، باخچەی منداڵاندا سێیەک و دوو لەسەرسێی داهاتی خێزان دەبات ، بەهای پاوەند لە ساڵی 1976 وە وەکو ئێستا دانەبەزیوە، بەرزبوونەوەی غاز و کارەبا بە ڕێژەی لە سەدا 84 لە سەرەتای ئەم مانگەوە سەرکەوتنی زیاتریش لە ساڵی نوێدا، ئەوانەی کە سلفەی عەقاری 200 هەزار پاوەندیان لەسەرە کە تا ڕادەیەك کەمە، وا پێشبینی دەکرێت تا کۆتایی ساڵی 2024 بڕی سلفەکەیان بە بڕی 5 هەزار و 100 پاوەند سەرکەوێت، کرێی خانووش بە ڕادەیەك لەبەرزبوونەوەدایە کە زۆرێك چی تر ناتوانن بیدەن، مەرکەزی خۆراك بەخشینەوەکان هەفتانە زیاتر قەرەباڵغ دەبن و خۆی داوە لە ملیۆنێك کە بەشێكی زۆریان کار دەکەن.

بە هاتنی سەرەك وەزیرانی نوێ ، لیز ترووس، و دەستەو تاقمەکەی ئابووری وڵاتی بەرەو داڕمان برد.  سیاسەتەکانی حکومەتی نوێ لە ئابووریدا کە چەند ڕۆژێک لەمەوبەر بەیانیان کرد هەر لە دژایەتی ژینگە، هەڕەشەی زیاتری سەرکوتکردنی خەڵکی و سنوردارکردنی زیاتری ئازادییەکان لە ڕێگای یاساوە، هەڵوەشاندنەەوەی لە سەدا 45 باج لەسەر داهاتی زیاد لە 150 هەزار پاوەند کە بڕیار بوو لە مانگی نیسانی ساڵی ئایندەوە بکەوێتە کار، هێڵانەوەی باج لەسەر کۆمپانیاکان کە لە ئێستادا  بە ڕێژەی لە سەدا 19 یە کە ئەمیش بڕیار بوو لە مانگی نیسانی ساڵی ئایندەدا ببێتە لەسەدا 25 ،  زیادکردنی بەشدارایکردنی بیمەی نیشتمانیی، هەڕەشەی دەستگرتنەوەی سەرفکردنی پارە  لە خزمەتگوزارییەکاندا، هەندێکی دیکە لەم سیاسەتانە وای کرد کە بەهای پاوەند هاڕە بکات و هاوکاتیش کارایی زۆر خراپی لەسەر تەواوی ئابووریی دانا. هەموو ئەمانە ڕۆژانە لە سەر ژیانی ئاسایی هەرە زۆرینەی خەڵك ڕەنگدەداتەوە.

بۆ چارەسەری ئەو بارەی کە خولقێندارا و بۆ ئەوەی بەهای پاوەند زیاتر نەشكێ، بانکی مەرکەزی بەدەم حکومەتەوە هات وبڕیاری دا کە بۆ ماوەی دوو هەفتە بایی 65 ملیار پاوەند ‘بۆند’ی [ لام وایە بە کوردی کۆمپیالە و سەنەدی کۆنی خۆمان دەگرێتەوە]  کڕی بۆ فرۆشتنەوەی .  ماوەی ئەو دوو هەفتەیەیە کە بۆی دیاریکرابوو  تا ڕۆژی هەینی هەفتەی پێشوو بوو، 14/10 تەنها بایی 7 ملیار بۆند کڕڕا و نرخی پاوەندیش هیچ نەچووە سەرەوە و یارمەتی حکومەتیشی نەدا لە ئارمکردنەوەی بازاڕ و بۆرصەدا.  ناچار سەرەك وەزیران وەزیری دارایی کە برادەر و هاوپەیمانێکی زۆر نزیك و دێرینی خۆی بوو دەرکرد و کەسێکی دیکەی کردە وەزیری دارایی .

ئایا دانانی  وەزیری دارایی نوێ ئەم گرفتە لابەلا دەکاتەوە؟

بە بڕوای من گرفتەکە نەك هەر بە گۆڕینی دەموچاوەکان، بەڵکو بە گۆڕینی حیزبەکانیش لابەلا نابێتەوە. ڕاستە سەرەك وەزیران وەزیرێكی نوێی داناوە و بڕێك ئایدیای هەیە بۆ چارەسەری کێشەکان و هەرەها لە گەلێك لەو سیاسەتانەی  پەشمیان بووەتەوە بەڵام پەشیمانبوونەوە و هەڵپەساردنی بڕیارەکانی بۆ ئایندە، نە یارمەتی بەردەوامبوونی حوکمی دەدات و نەچارەسەری گرفتەکانیش دەکات،  چونکە 40 ملیار پاوەند دەبێت جێگای بۆ بکرێتەوە و پڕ بکرێتەوە کە نازانرێت لە کوێوە هاتووە.

 لەم وڵاتانەدا لەبەرئەوەی حکومەت لەسەر پارەی باج دەژی ناتوانێت و ناکرێت بڕیاری هاوکاری کەرتێکی خزمەتگوزاریی وەکو پەروەردە، تەندروستیی، هاتوو چۆو ئەوانی دیکە بدات، یاخود باج  لەسەر لایەنێك بهێنێتە خوارەوە یا بیمەکان زیاد بکات  ئەگەر بە گوێرەی ئەو پارەیە، پارەی بۆ دیاری نەکرابێت و سەرچاوەی هاتنی ئەو پارەیە یا ئەو بڕە باجە داشکاوە بەیان نەکرابێت.

چارەسەرکردنی ئەم 40 ملیارەش کە ڕەنگە بڕێك بەهای پاوەند بەرزبکاتەوە و ئابووریش تۆزێك ببوژێنێتەوە. بەڵام نانی ئەم هەنگاوە بۆ  وەزیری نوێی دارایی یاخود هاتنی حیزبی  لەیبەر  بۆ سەر حوکم زۆر زەحمەتە چونکە پەیداکردنی ئەم 40 ملیار پاوەندە بە ڕای من تەنها لە یەكێك لەم  چوار ڕێگایەوە دەکرێت . 

یەکەم: کەمکردنەوە و بڕینی بەشێك لە بیمەکان و پارەی شارەوانییەکان و خزمەگوزارییەکانی کە لە سەرەوە دەستنیشانم کردن.  ئەمەش گرفتی زیاتر دروست دەکات هەر لە زیادبوونی ژمارەی بەتاڵە و بوون بە بارێکی قورس بەسەر دەوڵەتەوە و  کەمبوونەوەی توانای کڕینی کاڵاکان، واتە هێواشکردنەوەی نشونمای ئابووریی ڕۆیشتن بەرەو قەیران.

دووەم: زیادکردنی باج لەسەر سامانداران و کۆمپانیاکانی بزنس و سەپاندنی باج بە سەر ئەو سەرمایانەی کە لە وڵاتانێك دانراون و باجیان لەسەر نییە.  ئەمەش ناکرێت و مایەی قەبوڵ نییە لە لایەن ئەو لایەنانەوە.

سێیەم: چاپکردنی پارەی زیادە لە لایەن بانقی مەرکەزییەو هەر وەکو لە سەردەمی کۆرۆنادا کرا لەژێر ناوی quantitative easing  ، ئەمەش دەبێتە هۆی بەرزبوونەوەی زیاتری قەرزی نەتەوەیی کە دانەوەی دەوێت .

چوارەم:  بەدەوڵەتیکردنی کەرتە تایبەتییەکانی وەکو وزە و ئاو و هاتووچۆ و هەندێکی دیکەیان. کردنی ئەمەش پێویستی بە قەرەبووکردنەوە هەیە و پارەیەکی زۆری دەوێت و گرفتێکی زۆریش بۆ دەوڵەت لە ئێستادا دروست دەکات، بۆیە کردنیان زۆر زەحمەتە.  

بێ گومان ئایندەیەکی نزیك وەڵامی ئەو پرسیارە دەداتەوە و داهاتوی ئابووری بریتانیامان بۆ دەردەکەوێت .

16/10/2022

بەردەوامبوونی کەرتە کرێکارییەکان لە مانگرتندا و دەنگدانی زۆرێکی دیکەیان بۆ مانگرتن هەروەها بوونی خۆپیشاندان و پرۆتێستێکی زۆر و نواندنی چالاکی کاریگەریی ڕاستەوخۆ لە لایەن دۆستانی ژینگە و بەرگریی لە مانەوە لە ژیان و گروپی بەرگری لە ئاژەڵان و گیانلەبەران و هەروەها چالاکترین گروپ ” نەوت بوەستێنە بەس بیوەستێنە” حکومەتی وا شپرزەکردووە کە بە گوێرەی یاسای کۆن کە بە دەگمەن ئازادیی ماوە و زەبرو زەنگی پۆلیس،  ئێستا وەزیری نوێی پۆلیس  و ناوخۆی بریتانی دەیەوێت دەسەڵاتێکی زیاتر بەدەر لەحەد بدات بە پۆلیس لە مامەڵەکردنیاندا لەگەڵ خۆپیشاندەران و ناڕەزاییکەراندا .  دەیانەوێت  یاسایەکی نوێ بهێننەکایە تاکو هەندێك لە کەرتە کرێکارییەکانی وەکو خەستەخانە و بەشی تەندروستی ، هاتووچۆ و ڕێگا و بان، کارەبا و غاز و ئاو ئەوانی دیکەی کە دەوڵەت مانگرتنیان بە مەترسی دەزانێت لەسەر خۆی ، یا قەدەغە بکەن یا لانی کەم ناکارایان بکەن بە دانانی ژمارەی مانگرتوان  و وەخت و ڕۆژ و بردنیان بۆ مەحکەمە تاکو مەحکەمە بە بڕیارێك مانگرنتەکەیان پەك بخات.  سەرپێچیش لە بڕیاری مەحکەمە گرتنی سەرۆك و سەرکردەکانی نقابە و هەڵپەساردنی بوجە و دارایی نقابەیە و  ڕێگرتنە لە کردنی هەندێك کاری سەرەکیی.

دوێنێ، ڕۆژی  شەمە، 15/10 ، گروپی ” نەوت بوەستێنە بەس بیوەستێنە” بۆ ڕۆژی 15یەم  لە سێنتەری لەندەن شەقامێکیان بلۆک کرد بۆ ماوەیەك،  ئەمە زیاتر هانی وەزیر دەدات کە پاوەری زیاتر بدرێت بە پۆلیس .  هەروەها ڕەتکردنەوەی ئەو چالاکیانە لە لایەن میدیاوە و بە خراپی باسکردنیان هەژموونی خۆی لەسەر خەڵکانی ئاسایی داناوە وەکو دەبینیت لە وێنەکەدا کە چۆن کەسێك یەکێك لەو چالاکوانە بە تەمەنە وەکو کەلاکی گیانلەبەرێک یا ئاژەڵێکی مردوو بەکێش دەکات بێ گوێدانە هیچ بەر پرسیارییەك ، کە ڕەنگە ئەو کەسە نەخۆشی دڵی هەبێت ، فشاری خوێنی هەبێت ، شەکرەی هەبێت یا هەر نەخۆشییەکی دیکە ، چونکە حکومەت و میدیا پاڵپشتی ئەو جۆرە کارانە دەکەن و لایتی سەوزیان بۆ هەڵکردووە.

ئەگەر نەکەوینە خۆمان لە بریتانیا هەموو ئازادییەکانمان لەدەست دەچێت .