26/10/2022
گەر چی دەسەڵاتدارانی ئێران هەموو ڕێ وجێیەکیان ، هەموو هەڕەشەو فشارێکیان، هەموو تاکتیک و ئامرازی سەرکوتکردن و دامرکانەوەیەکیان تەگبیر کردووە و لاشیان ئاسانە کە بیخەنە کار بەڵام لەگەڵ هەموو ئەمانەشدا ڕاپەڕیوان تەحەدایان کرد و لە بەرانبەر دەسەڵاتداران و چەقۆ وەشێنەکانیاندا سەربەرزانە و خۆڕاگرانە ڕاوەستاون.
ئەمڕۆ لە زۆرێك لە شارەکانی ئیرانەوە لە تاران و سنە و ئەهواز و زاهیدان و سەقز هەروەها زانکۆکاندا خۆپیشاندان و ناڕەزایی گەورە بەردەوامە دژ بە ئاخوندەکانی دەسەڵات لە یادی چلەی ‘ ژینا ‘ دا.
یەکێك لە خۆپیشاندەران لە گرتەیەکی ڤیدۆییدا لە زانکۆی شەهید چەمرانی ئەهواز، لە باشووری ڕۆژئاوای ئەهواز، دروشمەکە دەڵێتەوە ئەوانی دیکەش بە دوایدا : “ڕەنگە خوێندکارێک مردن قەبوڵبکات، بەڵام زەلیلکردن قبوڵ ناکات”.
دەزگا ئەمنییەکان هۆشدارییان داوەتە بنەماڵەی ژینا ئەمینی لە ئەنجامدانی مەراسیمێک کە داوا لە خەڵک نەکەن کە ڕۆژی چوارشەممە لە پارێزگای کوردستان سەردانی گۆڕەکەی بکەن، بە پێچەوانەوە “پێویستە خەمی ژیانی کوڕەکەیان بخۆن“.
هاوکاتیش ئاژانسی هەواڵی دەوڵەتی ئیران ڕاگەیاندنێکیا بە ناوی بنەماڵەی ‘ ژینا ‘ وە بڵاوکردەوە کە گوایە بنەماڵەی ‘ ژینا ‘ ڕایانگەیاندووە “بە لەبەرچاوگرتنی بارودۆخەکە و بۆ ئەوەی لە هەر کێشەیەکی بەدبەختانە دوور بکەوین، ڕێوڕەسمێک بە بۆنەی چلەمین ڕۆژی ‘ژیان ‘ وە بەڕێوە نابەین”. بەڵام چالاکوانان لە ئێران دەڵین ئەو لێدوانە لە ژێر فشاردا بووە و سەرەڕای ئەوەش چاوەڕوان دەکرێت لەسەر گۆڕی ژینا ئەمینیدا گردبوونەوە هەبێت بۆ ڕێزلێانی.
Anarkistan ئەنارشیستان 
پێویستە لە ژوورەوە بیت تا سەرنج بنێریت.