خۆپیشادان و پرۆتێستەکانی سریلانکە:

01/04/2022

لە سەرەتای مانگی پێشووەوە، مانگی ئازار، بیزاری و  خۆپیشاندان و پرۆتێست لە سریلانکە بە تایبەت پایتەختەکەی کۆڵۆمبیا، بەردەوامە .

خۆپیشاندان و پرۆتێستەکان دژ بەو ئەزمە ئابوورییە کە خەڵکی لەوێ توشی بووە و بە هۆی گرانبوونی نرخی وزە و خواردن و پێداویستییەکانی دیکەی ڕۆژانەی خەڵک.

دوێنی لە پەلاماردان و ئابڵوقەدانی ماڵی سەرۆکی ئەوێ Gotabaya Rajapaksa کە ویستیان دەستی بەسەردا بگرن پاش ئەوەی کە حکومەت نایەوێت و ناتوانێت کە هیچ کارئاساییەك بۆ کەمکردنەوەی ئەو قەیرانە بکات لەسەر خەڵکە ئاساییەکەی ، لە هێڕشی پۆلیس و بەشێکی سوپا و پاسەوانانی سەرۆکدا بۆ سەر پرۆتێستەکە  50 کەس بریندار بوون و 45 کەسیش دەستبەسەرکران. خەڵکی ناتوانێت هیچ کام لەمانەی دەستبکەوێت نە نەوت و نە گاز بۆ چێشتدروستکردن و نانکردن ، نە دەرمان و نە شیر و نە کەرەسە سەرەتاییەکانی خواردن و خواردەمەنی .  حکومەت چی تر ناتوانێت ئەمانە هاوردە بکات بە هۆی ئەوەی کە پارەی بێیانەی وەکو دۆلار ، یورۆ، یاخود پاوەن نەماوە تاکو ئەوانەی سەرەوەی پێبکڕێت.

خێزانی ڕاجاپاکسا ماوەیەکی زۆرە لەسەر حوکمن ئەوانیش ئەزموونی ئێمەیان وەرگرتووە لە بەڕێوەبردنی سریلانکەدا: سەرەك وەزیران و وزیری دارایی و وەزیری کشتوکاڵ  برای سەرۆک کۆمارن ، برازای سەرۆکیش وزەیری وەرزشە.  ئەمەش ڕك و کینەی خەڵکی زۆر زیاد کردووە وداوای دەست لەکارکێشانەوەی تەواوی حکومەت دەکەن.

شەقامەکان بەتاڵن لە سەیارە بە هۆی نەبوونی بەنزین و گرانبوونیەوە .  لیترێکی بەنزین لە 128 ڕوپیەوە هەڵکشاوە بۆ 300 ڕوپییە ، ڕۆژانە 10 بۆ 12 سەعات کارەبا دەبڕێت و ئیتر خەڵکیش ناتوانێت نە پانکە و نە موبەڕیدە بەکار بهێنێت ، سوپەرمارکێتەکان زۆربەی وەخت دادەخرێن لەبەر نەبوونی کارەبا ، مەوعیدەکانی دکتۆر و خەستەخانەکان هەر بە هۆی نەبوونی کارەباوە هەمووی هەڵوەشاوەتەوە ، حکومەتیش بۆ خەزنکردنی وزە هەموو گلۆپی شەقامەکانی کوژاندۆتەوە کاریان پێناکات.

  سریلانکەش وەکو زۆرێك لە ولاتانی دیکە دیلی دەستی قەرزی صندوقی دراوی نێودەوڵەتییە یاخود دەوڵەتە دەوڵەمەندەکانە ، ئەمساڵ 7 ملیار دۆلاری داوەتەوە، کە لە سەدا 10 ئەم قەرزەکە هی دەوڵەتی چینە .