بێ بەڵگە، بەس دڵنیا

شاخەوان عەلی

12/02/2022

نرخی پۆست و پلە و پایەکان بەجۆرێک بەرز بوونەتەوە لە عێراقدا، خەریکە ینک و پدکیش بۆیان نەکڕدرێ.

لەدوای هەڵبژاردنەکانی پارلەمانی عێراقەوە، فلس بە فلسی داهاتی ینک و پدک، کە سەرچاوەکەی لە تاڵانکردنی داهاتی خەڵکی کوردستانەوەیە، تەرخانکراوە بۆ کڕینی پۆستەکانی عێراق بۆ بەرپرسانی حیزب و بنەماڵەکان. کەچی هەر بەشیش ناکات..

مانگی ڕابردوو، هەرچی پرۆژەی خزمەتگوزاری سنوری ینکە وەستا، تەنانەت پارەی دەرمان و زبڵیش نەدراوە، بەم حاڵەشەوە ئەوترێ 25ملیار دیناریشی قەرزکردووە…

کەچی هێشتاش پێدەچێت نەتوانێ پۆستی سەرۆک کۆماری بۆ بکڕدرێ!

ئاخر ینک خاوەنی ملیارەها دۆلارە.. تەنها داهاتی مانگێکی کە لە داهاتی ناوخۆ دەسی دەکەوێت، ئەوەی کە زۆر زۆر ئاشکرابێ، بەلای هەرە هەرە کەمەوە، 180 ملیار دینارە..

..

لە حکومەتی عێراقدا، لە فەرمانبەریەوە تا سەرۆکی کۆمار کڕین و فرۆشتنی پێوە دەکرێت، نرخەکان لە دەهەزار دۆلارەوە دەست پێدەکات(نرخی دامەزراندنی فەرمانبەرێک).. هەر بەم جۆرە مدیری و وەزیری و سەرۆکی وەزیران و سەرۆک کۆماری و تێکڕای پۆستەکان لە موزایەدەدان بۆ کڕین و فرۆشتن.

..

عێراق تاقە وڵاتێکە کە زۆر بێحورمەتانە و زۆر بێپەرده و بە ئاشکرا، کوتلە سیاسیەکانی خەریکی معامەلەن، نرخی یەک پارلەمانتار (ئەڵبەد خۆی نا، دەنگی) بۆ نزیکەی یەک میار بەرز بۆتەوە!!! ئەویش تەنها بۆ یەک فەڕڕە، واتا یەک دەنگدان!

بەشداری سیاسی لە عێراقدا، ئازادی سیاسی نیە.. ئازادی جورمیە!

تۆی دەنگدەر، لە ڕۆژی دەنگداندا، ڕێگات درا، ئازادانە مومارەسەی جەریمەیەک بکەیت کە بەشداری سیاسیت بوو، دەنگدان بوو…

لەئەنجامی بەشداری جەریمەی سیاسی عێراقیەکان و پارلەمانتاریزمەوە، عێراق بە دەردێک چووە، شایانی بەزەییە.. بەجۆرێک نابوود و تاڵان دەکرێت کە نموونەی نیە لەسەر نەخشەی سیاسی دوونیادا.