هۆکاری وەرگۆڕانی ئامانجەکان/ڕەتکردنەوەی سیستەم و پێکهاتە و ڕێکخستنی قووچکەیی چینایەتی

هۆکاری وەرگۆڕانی ئامانجەکان

هەژێن

٠٩ی ئازاری ٢٠١٥

(٢)

ڕەتکردنەوەی سیستەم و پێکهاتە و ڕێکخستنی قووچکەیی چینایەتی، واتە پێچەوانە خۆڕێکخستنەوەی ئازادیخوازان لە پێکهاتەی ئاسۆیی و زنجیرەیی ناچینایەتیدا.

هەرچەندە ئامانج لە پێکهێنانی ڕێکخراوە جەماوەریی و ڕامیارییەکان دژایەتی سیستەم و ڕەتکردنەوەی پێکهاتەی چینایەتی بێت، بەڵام بەداخەوە تا تاکو ئێستا سەرەنجام هەموو هەوڵ و تێکۆشانی مرۆڤە ئازادیخواز و یەکسانیخواز و خۆبەخشکارەکان ناڕاستەوخۆ بووەتەوە بە بەهێزکەرەوەی سیستەم و پێکهاتەیەك کە دژایەتیانکردوون و ئامانجیان لەنێوبردنیاب بووە. بۆ نموونە زۆربەی ڕێکخراوە کرێکاریی و جەماوەرییەکانی ژنان، خوێندکاران، فەرمانبەران، پەککەوتان، کەمئەندامان، خانەنشینان، ..تد پاش سەدە و نێوێك تەنیا ئاریستۆکراسی (Aristocracy)یان بەرهەمهێناوە و ڕۆڵیان میانجیگەریی نێوان خاوەنکار و کرێکاران، میانجیگەریی سەروەران و ژێردەستان، مشەخۆران و ڕەنجخوراوان بووە و وەك ڕامیاران و پارتییەکان بوونەتە ئامراز بۆ بەناوبانگبوون و خۆشگوزەرانی کەمینەیەکی دەسەڵاتخوازی سەرووی ئەو ڕێکخراوانە و لە هەموو بارەکاندا تەنیا خۆشباوەڕیی پاشڕەوانیان بە ڕزگارکەریی پارتییەکان و سەرانی پارتییەکان بەهێزکردووە و لە بەرانبەردا وەك هاوتەریبی سیستەمە چینایەتییەکە تاکی ژێردەست و ناڕازییان لە هەموو خۆبەکاربوون و خۆڕزگاریی و خۆبیرکردنەوەیەك خاڵیکردووەتەوە.

هەموو پارتییە بەناو کۆمونیست و سۆشیالیستەکان یا بوونەتە بەشێك لە سیسەمی پارلەمانی یا بەهۆی کودەتا و دەستەمۆکردنی ڕاپەڕینەکانەوە بوونەتە کوتەکی سەر سەری ئەوانەی کە بەناویانەوە خۆیان قووتکردووەتەوە یا بەهۆی سەرکەوتگەریی و سکتاریزم و ململانێی دەسەڵاتخوازانەی دەستە و گروپ و ئاراستەکانی نێویانەوە وەك ڤایروس بەردەوام لە کەرتبوون و وەچەخستنەوەدابوون، کە لە هەموو بارەکاندا تەنیا خۆشباوەڕیی پاشڕەوانیان بە ڕزگارکەریی پارتییەکان و سەرانی پارتییەکان بەهێزکردووە و لە بەرانبەردا وەك هاوتەریبی سیستەمە چینایەتییەکە تاکی ژێردەست و ناڕازییان لە هەموو خۆبەکاربوون و خۆڕزگاریی و خۆبیرکردنەوەیەك خاڵیکردووەتەوە. تاکی ناڕازیی و یاخیان بەناوی سۆشیالیزمەوە لە ڕێکخستنی قووچکەیی هاوشێوەی سیستەمە چینایەییەکە ڕێکخستووەتەوە و بە مێخی گەورەتر و خۆخوزانەتر بە کۆمەڵی چینایەتییەوە شەتەکیانداوەتەوە.

ئەگەر بەوردی سەرنجبدەین بێجگە لە جیاوازیی ڕواڵەتیی پاگەندە و بەڵێنە سەرخەرمانییەکان، هیچ جیاوازییەكی لە پێکهاتە و ڕێکخستن و میکانیزم و پەیوەندی نێوخۆیی ئەو ڕێکخراوە بەناو “سۆشیالیستیی و کۆمونیستی”یە جەماوەریی و پارتییانە و ڕێکخراوە زەرد و پاشکۆکانی دەسەڵات و پارتییە بۆرجوازییەکان و سیستەمی چینایەتی و ڕەوت و ئاراستەی چینایەتیدا نییە و هەموویان تەواوکەری یەکدین.

لێرەوە بەو سەرەنجامە دەگەین، کە گرنگ نییە ئێمە پاگەندەی چی دەکەین و چەندە لە دروشمداندا خۆمان سووردەکەینەوە و دەستەکانمان ڕادەوەشێنین و چەندە خۆمان بەکوشتدەدەین و چەندە خەڵك بۆ بەکوشتدان کۆدەکەینەوە، نەخێر، گرنگ ئەوەیە ئێمە چەندە دەتوانین پێچەوانەی ئیدئۆلۆگەکانی سەرمایەداری بیربکەینەوە، چەندە دەتوانین پێچەوانەی ڕێکخستنی بۆرجوازی خۆمان ڕێکبخەین و چەندە دەتوانین ئافەرێنەری پێکهاتەی ناچینایەتی ىین؛ ئیدی ئەو پێکهاتەیە خێزانێك بێت یا فێرگە و شوێنی کار و گروپی خۆجێی و ڕێکخراوەی جەماوەریی و تۆڕی کۆمەڵایەتیی نێو شارەکان و هەرێمەکان و هەرەوەزییەکانی کار و خزمەتگوزاری و پێکهاتەی سەرتاسەریی کۆمەڵ بێت.

ئەمەش بەو ئەزموونگەریی و خاڵەمان دەگەیێنێت، کە ناتوانین بە ڕێکخراوەی قووچکەیی و میانجیگەر تێکۆشانی جەماوەریی و کۆمەڵایەتیی پەرەپێبدەین. ناتوانین بە پارتیی و ڕێکخستنی ڕامیاریی وەك قووچکەییترین پێکهاتەی چینایەتی خۆمان ڕزگاربکەین. ناتوانین بە پاشڕەویی و دەستەمۆیی بیر و کاریزما و ئۆتوریتەی کەسانی دیکە خۆمان ڕزگاربکەین. ناتوانین بە ڕێکخستن و پێکهاتەی قووچکەیی، ڕێکخستن و پێکهاتەی قووچکەیی چینایەتی ڕەتبکەینەوە. لەبەرئەوە لەبەردەم ئەم پرسیارەدا خۆمان دەبینینەوە و وەڵامنەدانەوەی تەنیا هەزاربارەبوونەوەی هەڵە و شکست و نائومێدییەکان بەرهەمدەهێنێتەوە:

ئایا ئێمەی ژێردەست و نەدار توانای خۆڕزگارکردنمان هەیە؟

ئەگەر وەڵام ئەرێییە، چۆن و بە کامە میکانیزم و شێوازی ڕێکخستن و بیرکردنەوە و بڕیاردان؟

ئەگەر وەڵامەکە نەرێیە، دەی ئیدی بۆ ڕزگارکەرانمان بەناوی ئێمەوە ڕێكخراو و پارتیی و ..تد قووتدەکەنەوە و ئێمە بەکوشتندەدەن، بۆچی بەخۆیان ئێمە ڕزگارناکەن؟

ئەگەر وەڵام ئەوەیە، هێزی یەکگرتووی ئێمە مۆتۆری هەموو گۆڕان و شۆشێكە، دەی ئیدی چ پێویستمان بەڕابەریی و ڕێکخستن و بیرکردنەوەی ئەوانەی دەرەوەی خۆمان هەیە؟

************************************

https://hejeen.wordpress.com

Min nevêt kesek bybte serukê min – من نەڤێت کەسەک بیتە سەروکێ من

Xwastî hebûnî serok , nîşaney destemoyî xoye
Bêdengî beranber tîror û serkut, bellgey derbarîy her kesêke …

Ewî kemêk rêz bo mrovbûnî xoy, bo serbexobûnî û kesayetî xoy, bo maf û awezdarîy xoy dabnêt, hergîz bwar be hîç kesêk nadat bbête serokî (şwaney).

Ewaney ke xwazyarî serok û raberr bo xoyan û xêzan û komellyanin, kesanêkî destemokrawn wek her ajellêkî destemokraw çawerrêy neqîzey xawenekanyanin.

Ewî bixwazêt neçête rêzî destemoyan û kesayetî têkişkawan, hergîz le beranber rfandin û bêseruwênkirdnî em lawaze azadîxwazeda natwanêt bêdengibêt.

Ba hemûman bo rizgarbûnî ( perrevan ‘umer ) denghellbrrîn
Ba le hemû goşeyekî dunyawe be hemû zmanêk desellatî tîror û serkut le herêmî kurdistan qawbdeyn

Hawrrêyanî azadîxwaz, tkaye le her goşeyekî em cîhaneda dejîn û be her zmanêk ke deyzanin, hewallî rfandin û bêseruşwênkirdnî (perrevan ‘umer) lenêw şarî dhok bgeyênne azadîxwazanî cîhan

 

خواستی هەبوونی سەرۆک ، نیشانەی دەستەمۆیی خۆیە
بێدەنگی بەرانبەر تیرۆر و سەرکوت، بەڵگەی دەرباریی هەر کەسێكە …

ئەوی کەمێك ڕێز بۆ مرۆڤبوونی خۆی، بۆ سەربەخۆبوونی و کەسایەتی خۆی، بۆ ماف و ئاوەزداریی خۆی دابنێت، هەرگیز بوار بە هیچ کەسێك نادات ببێتە سەرۆکی (شوانەی).

ئەوانەی کە خوازیاری سەرۆک و ڕابەڕ بۆ خۆیان و خێزان و کۆمەڵیانن، کەسانێكی دەستەمۆکراون وەك هەر ئاژەڵێکی دەستەمۆکراو چاوەڕێی نەقیزەی خاوەنەکانیانن.

ئەوی بخوازێت نەچێتە ڕێزی دەستەمۆیان و کەسایەتی تێکشکاوان، هەرگیز لە بەرانبەر ڕفاندن و بێسەرووێنکردنی ئەم لاوازە ئازادیخوازەدا ناتوانێت بێدەنگبێت.

با هەموومان بۆ ڕزگاربوونی ( پەڕەڤان عومەر ) دەنگهەڵبڕین
با لە هەموو گۆشەیەکی دونیاوە بە هەموو زمانێك دەسەڵاتی تیرۆر و سەرکوت لە هەرێمی کوردستان قاوبدەین

هاوڕێیانی ئازادیخواز، تکایە لە هەر گۆشەیەکی ئەم جیهانەدا دەژین و بە هەر زمانێك کە دەیزانن، هەواڵی ڕفاندن و بێسەروشوێنکردنی (پەڕەڤان عومەر) لەنێو شاری دهۆک بگەیێننە ئازادیخوازانی جیهان